王維基廣告力量同幻想會嚇你一跳

（作者按：為方便嵌入Youtube短片，此文於此網誌上載，敬請留意。）

王維基嘅生意頭腦同電視創意，人人旨知，人人佩服。不過，佢嘅廣告宣傳創意，同樣叫人拍案叫絕。點解城市電訊同香港寬頻都受到港人愛戴呢？韋健心諗因為當年王維基曾經推出一套又一套別出心裁嘅好廣告。

呢篇文章唔談電視發牌、唔講黑箱作業，純粹分享我曾經睇過嘅城市電訊同香港寬頻廣告。

殺價超人

要推王維基廣告，首推「殺價超人」。呢個殺價超人，近日被傳媒大肆報導，到底好响邊處呢，我唔使嘥口水再提喇。不過，韋健記得另一個殺價超人廣告（大概係九六年初），係用咗鄭少秋嗰首《無敵是最寂寞》做Background music，片中殺價超人就咁打個乞嚏就可以KO條香蕉怪，雖然好低B，但同時夠得意盞鬼。我反而覺得呢個唔似硬銷式廣告又唔太悲涼，似喜劇多尐。引入殺價超人係王維基當年一個好成功嘅決定，當時城市電訊播放多套殺價超人廣告，重（仲）播到千禧年初，王維基就係咁就搶到灘鳥。

普世寬頻

呢套〇二年尾製作嘅廣告（當時城市電訊開始轉型做寬頻生意），係年中嘅「十吓十吓」系列嘅聖誕版（「十吓十吓」系列主要講十永遠大過六亦好過六，暗示自家10Mb上網勁過對手嘅6Mb），應該少尐人提。成條片只係聽到成堆人好似青山病人咁「啦啦啦啦啦」唱聖誕歌，再加埋「$48」立體字「老是常出現」，令人覺得厭煩，好有洗腦Feel。但係正正因為夠煩夠洗腦，令到我印象深刻，到依家都記得起呢個廣告，我韋健心諗呢個都算係當時成功吸引好多人申請嘅原因。10Mb上網响當時蒞講其實係超快，一個月先四十八個大洋，畀著我都要啦。

劉翔廣告

〇五年香港寬頻搵咗劉翔代言自己嘅1000Mb寬頻，對比起三年前只得10Mb上網，速度增長咗一百倍。廣告講嘅係講劉翔心路歷程，亦都隱隱約約顯示出老闆王維基嘅拼搏精神，配合一首《海闊天空》，令人見者感動、聞者心郁。韋健相信，若然舊年再播出來，同樣可以振奮人心，不過隨著王維基本人撻埋Q，呢套嘢都已經變得過時鳥。

電話線上網

另一套我最鍾意嘅廣告就係呢個。想當年呢一輯廣告真係好絕核，重攞埋死咗成九十年嘅貝爾，將對手揪到應一應，最後搞到對手連忙出老鼠廣告反擊。我韋健真係好佩服王維難嘅勇氣，因為我記得呢輯廣告之後，就無乜呢類暗諷對手嘅廣告。就算係近排曾江新一輯嘅染髮霜廣告，都只係輕輕一兩句抽吓美源髮采水就算。你問我最記得邊句對白？就係「乜你覺得幾百年前發明電話線嗰陣，會知你今日攞蒞做寬頻咩？」另外有句「上載嘅速度約係下載嘅十分一」，到而家都係我上載嗰陣嘅「金科玉律」。

豈有此理

呢套廣告，承襲住上述嘅「電話線上網」系列廣告，保咗留對對手嘅暗諷手段，雖然比上一輯嘅遜色左尐，但玩味同樣十足，值得一再回味。我韋健重記得當時尐同學成日唱住「豈有此理」嚟調侃其他人。

我韋健只係想講，呢篇文章，只係用蒞讚揚王維基嘅創意，同懷緬一下昔日嘅香港，都曾經出產過一尐類似王維基嘅成功人士。依家王維基想搞電視，萬眾期待，偏偏政府要逆民意而行，最後搞到一鑊泡，最後搞到「獅子山下精神」徹底破碎。所以呢，我都係奉勸行政會議班蛋散鞠躬辭職算啦。

搬遷啟事

由即日起，本網誌的新文章將會遷移到FB專頁持續發佈，歡迎大家稍移玉步到專頁讚好和支持，至於在此站的舊文章則仍會保留。網址：http://www.facebook.com/waikinquote。

大學生「家長」

 

今日（八月卅一日），網友Andrew Wong上載了一幅在城大拍攝的相片，說那裡有一埸家長簡介會。同樣是九十後大學生的我，看完之後感到不勝唏噓。

我還依稀記得我小時候，我的父母也是替我打點一切。不過直到我讀小學的時候，除了要幫我選中學、簽回條、又或者去「家長日」之外，其他一般事情，諸如上車上學、買書、買校服等等，都是由我自己處理，就算連查看功課也不肯。現在我上了大學，從搜集學系資料、去大學開放日、填聯招表，至到入學、去迎新活動、上莊、認識朋友，所有事情亦是⋯⋯我一人決定，父母也只是提供金錢上的援助。現在基本上他們除了學費以及基本生活所需之外，其他有關我的事務也沒有理會。我父母十幾年來都經常都跟我說：「你大個仔喇，無理由要我哋理你咁多嘢㗎？」我當初不以為然，但現在聽起來都饒有道理。

雖然大學生仍要由家長照料不是甚麼大新聞，但是專程為家長而設的甚麼「簡介會」，我到現在才知道。今年（二〇一三至一四學年）入學的學生多數也是一九九五年出世的，換言之，部分大學新生已經過了十八歲生日，已經是成年人了。成年人者，已完全發育成熟之人也，他們可以去投票，亦可以看三級片，又可以合法地作性行為。如果他們成年，又上了大學，還要容許家長打點任何一切，那麼真的很羞家。

一向以恥笑年青人為樂的《經濟日報》 ，兩日前（八月廿九日）列舉了一些大學生和其家長的「奇怪」舉動（還有家長入O Camp陪子女、家長陪子女一起「傾莊」、家長教子女做Paper），我覺得今次的報導很中肯，值得一讚。有些回應更是一針見血：「入到大學又點，如果乜事都話怕適應唔到，咁叫佢收皮啦。」、「大學生程度，小學雞心智。」今年入學的大學生，真的與早兩年入學的比下去。除了那些家長緊張大學生子女，現在連大學也陪「怪獸家長」一齊癲，我除了要「唉」一聲，實在不知道要給甚麼反應。今日我罵大學也沒用，我只是期待大學不要再屈服在家長面前。

網上廣傳前惠普女CEO的話：「千萬別出賣你的靈魂！」這話給今年入學的大學生是最貼切的，共勉。

鄧紫棋曲線爭普選表現可嘉

首先，我哋一定要為鄧紫棋（鄧詩穎）小姐平反，我再講多一次，佢需要被平反。佢唔係如大家所講，佢支持梁振英，而係曲線倒梁撐普選，大家唔好再怪佢呢個妹喇。

誠如鄧小姐所講：「我想跟梁振英說句加油呀！」言下之意，就係想梁生繼續做落去。

需知道，梁振英已經步入曾蔭權嘅後麈，成為咗跛腳鴨一隻。而家梁生做乜嘢都會畀人鬧，既要受啊爺嘅指點，又要捱市民嘅怨氣，惶恐不可終日。唔好睇少呢句啊，呢句話表示上係為梁生打氣，實際上呢就叫梁生繼續做出氣包。只要梁生繼續做特首，市民就繼續儲怨氣，等到有一天人人變成「憤怒鳥」，佔領中環行動爆發，〇三七一嘅盛況就會再次出現，咁樣普選就有望喇。

由此可見，鄧小姐根本唔係做梁粉、擦啊爺嘅鞋，而係同市民企喺同一陣線，寧願畀人誤會，都選擇以曲線方式幫香港人爭取真普選。呢種犧牲小我嘅勇氣，值得我哋去好好學習喔。所以大家千祈唔好怪錯好人，亂咁批評佢投共，話哂佢啱啱過咗廿二歲生日，年紀輕輕，傷害弱小心靈就唔係咁好喇。

香港係一個有言論自由嘅地方，任何人都有權發表政見，無論係親共定反共都唔會犯法嘅。亂咁批評人哋嘅政見係唔理性嘅，就算係好似淨心BB咁亂講嘢，亦都無必要去為咗一尐意見而動氣㗎。明明鄧小姐實質上倒梁撐普選，你就話佢做咗梁粉，你而家擺明係同萬人擁戴嘅新一代樂壇小天后，以及一眾青少年擁躉作對。你哋呢尐小兵小卒識尐乜吖？

香港亦係充滿幹勁嘅地方，嚟得到香港，就應該學習一吓獅子山下嘅精神，就算喺而家通漲嚴重、生活成本極高、同老闆無理剝削嘅環境底下，都要「適當地調整個人心態」，自己幫自己。鄧小姐就係一個成功嘅例子，佢參考外國嘅作品，繼而憑住自己炮製多部膾炙人口嘅音樂巨作，獲得唔少掌聲。年青人要好好學習同仿傚喔。

所以呢，鄧小姐為廣大香港人嘅幸福而著想，付出了好大嘅努力。我哋一定要體諒吓佢，支持佢。但願鄧小姐繼續為香港人謀福祉，直到永遠，阿們。

 

「TVB抄襲嘅嘢你唔會明㗎！」

話說小明一家成日睇TVB，貪佢哋尐節目夠地道，不過近年嚟佢見到TVB出現大一堆似曾相識嘅嘢。

小明睇緊《香港早晨》。

啊爸：「啊囝，我想問《香港早晨》同《亞洲早晨》有咩分別呢？」
小明：「個名唔同囉，TVB嘅嘢你唔會明㗎。」

小明上Youtube睇《城市追擊》懷緬一下。

啊爸：「咦，《今日睇真D》搬咗落TVB播？」
小明：「呢個係《城市追擊》嚟㗎，TVB嘅嘢你唔會明㗎。」

小明睇《香港先生》。

啊爸：「又話停辦《香港男士競選》嘅，而家又搞返啊？」
小明：「傻的嗎？呢個係《香港先生》，唔係《香港男士競選》啊。TVB嘅嘢你唔會明㗎。」

小明睇《神探伽俐略二》。
啊爸：「日本仔真係衰，竟然抄足《談情說案》，無嚟創意！」
小明：「係《談情說案》抄嘢在先，TVB嘅嘢你唔會明㗎。」

小明睇緊港姐準決賽。

啊爸：「咦？點解港姐個M咁熟面口嘅？」
小明：「你唔知呢個係《怪獸公司》咩？TVB嘅嘢你唔會明㗎。」
啊爸：「咁即係《怪獸公司》拍真人版？」

小明：「!@#$%^&*~」

你懂不懂維基的規矩？

 

暢銷全球、家傳戶曉的費列羅，在香港不知是否因為過了氣而欲搏上位，還是宣傳部職員一時神經病發作，竟然叫人竄改維基百科條目，藉此為健達繽紛樂自我宣傳，如斯目中無人的程度簡直叫人啼笑皆非。

我在中文維基已經打拼了剛好七年，曾經見證過大大小小的破壞條目事件，諸如竄改條目、刪減內容、加入人身攻擊用詞、繁簡破壞、編輯戰等等，這些都是少部分無名的網民所作的零星作為。就算是為了自我宣傳而竄改條目的兇手，也是來自寂寂伙無名的小企業；但今次的破壞的幕後黑手竟是一間大公司，還要在三萬多名支持者面前炫耀，真的前無古人。

維基百科對「破壞」的定義有以下描述：「破壞是指以降低維基百科全書質量為目的而故意增刪或修改內容的行為，例如故意把正常內容替換成猥褻的、誹謗的、或者其他不相關的內容。」關於「廣告性破壞」亦定義為「在文中持續進行廣告或自我宣傳。但非為廣告目的之編輯內容（如有可靠來源評述的經典廣告詞或書評等）不在此限。」按照以上解釋，再比對以上宣傳的內容以及推廣期限，已經構成了「廣告性破壞」。

身為維基人，當然要為此等卑鄙無耻的行為作出譴責。維基百科廣為世人認識，當中規矩人人知曉。除非維基是你開設的，否則你進到別人的地方，就要守那裡的規矩，這也是做人的基本責任。費列羅這樣的無視規矩，既無助宣傳，又增加了維基管理員的負擔。破壞了條目內容，又破壞了企業的形象，何苦呢？

既然你們想玩此等玩意，我強烈建議你們開一個繽紛樂Wikia網站，既免費又有得自己隨意地修改內容，並可以動員一起玩。還不快點申請？在此刻，我只能祝願你們行運。

香港應開設「怪獸公司」

今時今日，怪獸公司已經唔再係神話。皆因近排有人開發緊「聲音能源」，重有人成功利用聲音幫手機叉電，响一個鐘之內叉咗六瓦特嘅電，真係唔畀十個趣都唔得。雖然我哋唔知幾時有真真實實嘅「怪獸公司」，但係如果真係有聲音發電廠，香港應該至少起一間。

香港被譽為「東方之珠」，係「亞洲國際都會」，既然係大都會，經濟自然會好蓬勃。要維持經濟，就要用好多電，不過而家能源好有限，日日靠燒媒好唔環保。之但係太陽能同風力發電係靠唔到幾多，靠個大亞灣又要擔心核輻射，所以要滿足龐大需求而又同時達致環保，就需要一間專門收集聲音來源（尤其係尖叫聲等嘈音）嘅「怪獸公司」喇。

讀者大人可能會覺得我好癲：「＿，係真唔係呀？！」諸君唔使擔心，其實所謂嘅聲音來源，香港境內邊度都搵到。你知㗎啦，而家旺角日日都咁嘈，到咗夜晚，成條西洋菜南街都有唔少街頭表演者，將個喇叭有幾大就調到幾大，連附近天台都聽到，唔整個聲音收集站嚟儲能源點得呢？淨係尋日成班市民到嗰度撐／踩林老師，粗口聲此起彼落，都夠哂用幾日啦。

除此之外，而家紅館成日搞大小演唱會，最常聽到嘅，唔係歌手嗌破喉嚨嘅歌聲同超大喇叭聲，就係一堆無知「粉絲」係又叫唔係又叫嘅尖叫聲。當醫神唱到「前塵硬化像石頭，隨緣地拋下便逃走……」，高呼同嘶叫聲立即湧現。當你知道醫神最後躁鬱症發作，要狂鬧臺下「粉絲」先至了事嘅時候，就會明白，唔响紅館整多幾個聲音收集站係好嘥嘅。

講到嘈音聖地，不得不提機場。就如Walter Ho所講：「機場跑道整個（飛機嘈音），郁下手推得郁半個客運大樓。」將個「怪獸公司」起响機場隔離，乘著近水樓臺之便，一舉幾得。

重有吖，如果响遊客區同港鐵車站車廂裝多幾個收集機就perfect啦。眾所周知，自由行都搞咗成十年，除咗多咗大陸客，重見多咗尐大陸細路同大陸BB。呢堆細路除咗識得製造黃金之外，原來佢哋嘅「獅吼功」都幾驚人。如果佢哋响商場同港鐵裡面發功，分分鐘重噪過大陸人講電話，甚至媲美鑽地聲。有網友用過分貝app，度到佢哋嘅叫聲曾經過一百分貝，你話係咪「後生可畏」呢？所以，如果喺海港城等地方放返幾個，就足以推動整個海港城嘅電力需要喇。一嚟慳電費，二嚟可以推動環保，何樂而不為？

總之，為咗推動環保，為咗滿足用電需求，為咗維持「亞洲國際都會」嘅美譽，我絕對支持政府喺聲音發電流行之後斥資起一間「怪獸公司」，收集各路嘈音化為能源，將香港再生能源產業進行到底！