鄧紫棋曲線爭普選表現可嘉

首先，我哋一定要為鄧紫棋（鄧詩穎）小姐平反，我再講多一次，佢需要被平反。佢唔係如大家所講，佢支持梁振英，而係曲線倒梁撐普選，大家唔好再怪佢呢個妹喇。

誠如鄧小姐所講：「我想跟梁振英說句加油呀！」言下之意，就係想梁生繼續做落去。

需知道，梁振英已經步入曾蔭權嘅後麈，成為咗跛腳鴨一隻。而家梁生做乜嘢都會畀人鬧，既要受啊爺嘅指點，又要捱市民嘅怨氣，惶恐不可終日。唔好睇少呢句啊，呢句話表示上係為梁生打氣，實際上呢就叫梁生繼續做出氣包。只要梁生繼續做特首，市民就繼續儲怨氣，等到有一天人人變成「憤怒鳥」，佔領中環行動爆發，〇三七一嘅盛況就會再次出現，咁樣普選就有望喇。

由此可見，鄧小姐根本唔係做梁粉、擦啊爺嘅鞋，而係同市民企喺同一陣線，寧願畀人誤會，都選擇以曲線方式幫香港人爭取真普選。呢種犧牲小我嘅勇氣，值得我哋去好好學習喔。所以大家千祈唔好怪錯好人，亂咁批評佢投共，話哂佢啱啱過咗廿二歲生日，年紀輕輕，傷害弱小心靈就唔係咁好喇。

香港係一個有言論自由嘅地方，任何人都有權發表政見，無論係親共定反共都唔會犯法嘅。亂咁批評人哋嘅政見係唔理性嘅，就算係好似淨心BB咁亂講嘢，亦都無必要去為咗一尐意見而動氣㗎。明明鄧小姐實質上倒梁撐普選，你就話佢做咗梁粉，你而家擺明係同萬人擁戴嘅新一代樂壇小天后，以及一眾青少年擁躉作對。你哋呢尐小兵小卒識尐乜吖？

香港亦係充滿幹勁嘅地方，嚟得到香港，就應該學習一吓獅子山下嘅精神，就算喺而家通漲嚴重、生活成本極高、同老闆無理剝削嘅環境底下，都要「適當地調整個人心態」，自己幫自己。鄧小姐就係一個成功嘅例子，佢參考外國嘅作品，繼而憑住自己炮製多部膾炙人口嘅音樂巨作，獲得唔少掌聲。年青人要好好學習同仿傚喔。

所以呢，鄧小姐為廣大香港人嘅幸福而著想，付出了好大嘅努力。我哋一定要體諒吓佢，支持佢。但願鄧小姐繼續為香港人謀福祉，直到永遠，阿們。