圖書館何必為$2.5而去畀$1.4發通知信？

話說近排突然收到一封從公共圖書館寄嚟嘅通知信，話我重有預約費$2.5未畀，要我兩個禮拜之內搞掂佢，唔係就暫停使用權。

事緣年頭我上網預約咗一本書，我無去攞，之後就無咗件事，亦都唔記得要去返圖書館畀$2.5去註銷，結果就嚟咗呢封通知信。我當然乖乖地去圖書館畀返$2.5，之但係我發現，圖書館原來畀咗$1.4郵費去發呢封信，心諗佢哋何必要噉做。

我認我唔記得畀錢而搞到康文署要「勞師動眾」，我都認自己無盡讀者責任令到康文署要自掏腰包。但我總係覺得，要追錢都唔使專登去付出$1.4郵費、用一張A4大嘅紙去通知人卦？我唔係話康文署唔應該發通知信，更加唔係為反而反（如果係反政府嘅話，就一早唔去政府嘅圖書館吖，係咪？），而係究竟康文署除咗發通知信之外，重有無另外一尐慳到成本嘅方法？

其實，康文署早喺幾年之前，已經提供四款電郵通知，分別係到期日提示、預約待取、預約取消同過期通知，慳紙之餘又慳郵費，噉點解康文署唔將呢個服務擴展到追錢通知呢？即使係因為人哋唔識／唔用／懶得去睇電郵，康文署都可以考慮吓用短訊發送，話哂一條短訊成本低過郵遞，而且差唔多所有香港人都有至少一部手機，幾乎日日都用，斷估唔會miss咗通知。如果有人真係唔用電腦／手機，或者所追討嘅金額好多（譬如超過$20），先至用返郵遞。

自稱係中產嘅財爺，都話過要量入為出，但身為政府體制嘅康文署，卻逆上頭嘅旨意。我就係唔明白，到底點解康文署兩個低成本方法唔用，而哂錢買定A4紙，跟住就為咗雞膆咁多嘅錢而畀$1.4郵費。如果要追嘅錢唔係$2.5，而係過期一日罰款$1.5，扣埋成本最後得返一毫子，噉又何必呢？

所以我強烈建議康文署採用以上方法去追錢，無論為環保、為納稅人、抑或為減低成本，總之咩都好，只要聽中產財爺講，就包你哋唔會:o)。